Co turismo parado no medio do carril, co motor aceso, coa porta aberta , sentado coas pernas fóra do vehículo e inconsciente. Así estaba un home no medio e medio da estrada DP-1704 (Cambre-Carral). Foron varios veciños os que avisaron ao 112, que enviaba unha dotación do Subsector de Tráfico da Garda Civil da Coruña e unha ambulancia.
Tras prestar atención médica ao condutor e restablecer a normalidade da circulación pola vía, os gardas civís realizaron ao condutor as pertinentes probas de alcoholemia, devolvéndolle un valor de 1. ,10. mg/l no aire exhalado, sendo a taxa máxima autorizada para este tipo de vehículos 0,25 mg/l.
A Garda Civil procedeu a investigar a esta persoa como presunta autora dun delito contra a seguridade viaria.
Prisión
O Sector de Tráfico da Garda Civil de Galicia lembra que este tipo de delitos leva penas de prisión de tres a seis meses ou multa de doce a vinte e catro meses ou traballo en beneficio da comunidade de trinta e un a noventa días, en caso de ser condenado.
Conducir un vehículo despois de inxerir alcol supón un evidente perigo para a circulación, a integridade física dos demais usuarios da vía e a do propio condutor.
