O Concello da Coruña pon en marcha o proxecto KM 0, unha iniciativa educativa e ambiental en colaboración con Ingesan, empresa do grupo OHLA.
O obxectivo principal é concienciar a case 500 alumnos e alumnas de entre sete e nove anos de catro centros educativos da Coruña sobre a importancia de adoptar prácticas sustentables, aplicando a regra de reducir, reutilizar e reciclar.
Os centros nos que levará a cabo este proxecto son o CEIP Sacra Familia, Salgado Torres, Víctor López Seoane e Fernández Latorre.
PRÉSTAMO DE XOGOS
Noutra orde de cousas, o Concello herculino puxo en marcha un servizo de préstamos de xogos de mesa, que presentou este luns a alcaldesa, Inés Rey, acompañada polo concelleiro de Cultura e Turismo, Gonzalo Castro, entre outros.
O plan comeza esta semana a súa primeira fase en catro bibliotecas: Ágora, Durán Loriga, Fórum Metropolitano e Os Rosales. Rey sinalou que esta é a fase inicial e que o obxectivo é expandilo a toda a rede de bibliotecas no futuro.
