O Museo Nacional de Ciencia e Tecnoloxía (Muncyt) da Coruña organizou unha programación especial para celebrar o Día Internacional dos Museos (DIM) ofrecendo actividades do 16 ao 18 de maio. Todas elas son gratuítas, con reserva previa e están orientadas a público xeral.
Segundo traslada a institución, baixo o título ‘O futuro dos museos en comunidades en constante cambio’, este ano o DIM centrarase en como estes centros poden “contribuír e navegar nun mundo que experimenta profundos cambios sociais, tecnolóxicos e ambientais”.
En concreto, informa, a programación contén o concerto ‘Bravissimas!: mulleres científicas e mulleres compositoras’. Un repertorio seleccionado e interpretado polo profesorado e alumnado do CMUS Profesional da Coruña ofrecerá “unha ampla variedade de música e de compositoras, de distintos estilos e épocas históricas”.
Inclúe tamén o espectáculo ‘A historia do cabaliño aventureiro’, de Teresa Procaccini. Trátase dun conto musical de pezas de piano que narra as experiencias dun cabalo viaxeiro que escapa da súa cómoda vida porque aspira a novos e mellores horizontes. Ademais, tras o concerto, realizarase un taller de artes plásticas onde os asistentes se inspirarán na música e textos escoitados.
Outra das actividades deste ciclo é Proxección Sonora IV ‘Universos, signos & constelacións’, integrada nun proxecto didáctico enmarcado no Festival RESIS, que ten o obxectivo de achegar distintas disciplinas artísticas relacionadas coa música e a tecnoloxía a persoas con discapacidade.
