A Sección Segunda da Audiencia Provincial da Coruña celebrará os días 20 e 21 de maio a vista oral contra o alcalde de Oleiros, Ángel García Seoane, e o arquitecto técnico municipal, imputados por un presunto delito contra o patrimonio histórico debido á demolición da Casa Carniceiro, situada na avenida das Mariñas.
Segundo o Ministerio Fiscal, ambos os acusados actuaron sabendo que infrinxían a normativa vixente. En concreto, a Fiscalía considera que “coas súas actuacións fixeron posible que o edificio fose derrubado case por completo”, permanecendo só restos do muro da planta baixa e parte das estruturas do semisótano. Para cada un deles, solicita penas dun ano e tres meses de prisión e inhabilitación para cargo público durante 12 anos.
O informe recolle que a Casa Carniceiro, de titularidade privada pero ofrecida ao Concello en 2019, sufriu un incendio en xullo de 2020, tras o cal foi declarada en estado de ruína técnica e económica. A pesar disto, a Dirección Xeral de Patrimonio Cultural advertira que, ao tratarse dun ben catalogado, calquera actuación debía contar coa súa autorización previa, e que a ruína non xustificaba unha demolición integral, senón un proxecto de rehabilitación con demolicións parciais limitadas.
A Fiscalía sinala que o Concello de Oleiros non respondeu á solicitude dos propietarios de ampliar o prazo para acometer medidas de urxencia, e que “non se realizou ningunha acción para conservar o inmoble”. Engade que o alcalde ditou en decembro de 2020 o decreto que permitiu a demolición, malia coñecer os informes técnicos e os requirimentos da Xunta.
A defensa de García Seoane ten argumentado en anteriores ocasións que a decisión responde a criterios de seguridade cidadá, polos efectos do incendio e polos danos provocados por temporais, pero a Fiscalía insiste en que os responsables municipais actuaron “a propósito de que a normativa impedía a demolición total”. O xuízo esclarecerá se existiu responsabilidade penal pola perda dun elemento do patrimonio arquitectónico galego.
