Espectacular ambiente en Santa Cruz para celebrar o seu día máis musical no marco da celebración dos 25 anos da Escola Municipal de Música.
A xornada arrincaba cun roteiro musical de pola mañá, celebrándose ademais unha serie de concertos deslocalizados por distintos lugares do paseo marítimo e o parque Luis Seoane. Gran expectación xeraron estas demostracións de pequeno formato con conxuntos musicais coordinados por profesores da escola con agrupacións de corda, percusión, coros, música de cámara, canto lírico, música tradicional, saxos, clarinetes, flautas, piano, música moderna e combos, ademais dun específico de música infantil.
En total unha mañá tinguida de sons múltiples e diversos nos que predominou a música clásica executada por 110 músicos da EMMO nos distintos concertos programados.
Pero a gran cita era pola tarde e reunía a medio Oleiros na praza Esther Pita para a representación de Mamma Mía, a montaxe na que máis de 200 artistas homenaxean a ABBA versioneando este famoso musical internacional, repetindo o éxito da pasada semana na Lagoa de Mera.
Os membros Escola estiveron acompañados sobre o escenario de alumnado da Escola de Danza e o coro Tremenda Tremolina, todo baixo a dirección xeral de Malu Balado.
Un importante éxito colectivo do que forman parte o conxunto do profesorado das escolas. Na dirección e adaptación musical figura Rodrigo Rodríguez, Nilo García na dirección da orquestra sinfónica, Coco Pereira dirixindo Tremenda Tremolina e Lara Fenoll na Escola Municipal de Danza. Tamén participaron no espectáculo os profesores Marina Gundín, Mónica Pérez, Álex Carral e Jorge Galán.
