A sección segunda da Audiencia Provincial da Coruña celebrará o día 12 o xuízo contra un home por vexar e denigrar a certos usuarios das instalacións deportivas de Dorneda, no municipio coruñés de Oleiros, por razón da cor da súa pel. Tras un erro en relación aos sinalamentos deste martes e os escritos de cualificación, finalmente será o xoves cando terá lugar a vista na que está prevista que se chegue a un acordo de conformidade entre as partes.

Segundo recolle o escrito de cualificación fiscal, o acusado proferiu cara a outra persoa, en xuño de 2022 e en reiteradas ocasións diante dos demais usuarios e monitores do centro, así como de menores de idade, expresións como “negro de merda, volve en patera, vaiche a África” tendo que intervir o monitor da sala. Días despois, o procesado atopouse con esta persoa e pediulle desculpas, pero ao contestarlle este con un “ok”, volveu reiterarlle os mesmos insultos e expresións, tendo que intervir o monitor. O mesmo fixo nos vestiarios con outro home, que se atopaba cos seus fillos de pouca idade. Isto motivou que fose expulsado do centro.

A Fiscalía cualifica os feitos como constitutivos de dous delitos cometidos con ocasión do exercicio dos dereitos fundamentais e liberdades públicas en concurso con dous delitos contra a integridade moral. Por iso, pide unha pena de 20 meses de prisión.