A Comisión de Centro do Complexo Hospitalario Universitario da Coruña (Chuac) denunciou “o peche este verán de máis de 230 camas”, principalmente de Medicina Interna, no hospital universitario, no Abente e Lago e no Materno Infantil. “Estes peches, presentados como unha reordenación, non contan con alternativas nin reforzos asistenciais e teñen un impacto directo sobre a atención aos pacientes”, sinalan nun comunicado.
Fronte a iso, desde a xerencia indican que “como ocorre todos os anos na época estival, este verán a Consellería de Sanidade terá o 100 % das camas hospitalarias dispoñibles se así o require a demanda asistencial”. “Unha vez feita a análise pormenorizada dos recursos necesarios en cada unha das sete áreas sanitarias e tendo en conta a ocupación media de camas rexistradas en cada unha delas o pasado verán, a Consellería de Sanidade manterá operativas preto do 92 % das camas dos seus hospitais”.
Isto, sinala ao aludir a un 91,7 %, “supón unha porcentaxe superior ao do ano pasado (88,6 %), aínda que se habilitarán máis de ser necesarias xa que o 100 % delas estarán dispoñibles para ser empregadas“. Tamén indica que a planificación asistencial faise tendo en conta factores como “os menores índices de ocupación hospitalaria”.
