A artesanía galega vive un bo momento en canto a número de artesáns e artesás, máis de 800, cun traballo de “calidade” recoñecido tanto dentro como fóra de Galicia, aínda que con dificultades de substitución xeracional, sobre todo nalgúns oficios. Así o apunta, en declaracións a Europa Press, José Manuel Salvado Sanín, presidente da Asociación Galega de Artesáns (AGA), que destaca o bo momento que viven algúns oficios, como é o seu caso coa fabricación de instrumentos fronte ás dificultades doutros, facendo alusión, ademais, ás dificultades de substitución xeracional nalgúns produtos artesanais.
“Hai moi bos artesáns, moi recoñecidos en toda a península, e o nivel de calidade da artesanía en Galicia é moi alto”, sinala para precisar que aínda así a substitución xeracional é “difícil”. “A xente vai incorporándose ao sector non da maneira que debería ser, debería entrar máis xente nova da que está a entrar”.
“Existe un certo relevo pero non grandísimo“, asegura para incidir en que dedicarse a esta profesión supón “dar un salto ao baleiro”. No seu caso, un artesán dedicado a instrumentos tradicionais como pandeiretas ou bombos, indica que non hai pesimismo de cara ao futuro. Isto vincúlao con “o auxe” da música tradicional galega.
“Cando empecei hai 35 anos había tres artesáns en Galicia que facían percusión e agora hai máis de 40, sobre todo nos últimos anos, é algo que crece e que está vivo”, di para contrapor esta situación á doutros profesionais como os “cesteiros”. Mentres, destaca o bo momento de actividades como o coiro ou a xoiaría. “Consolidamos e ensinamos o valor da artesanía, que é un valor cultural que vai máis aló do mercantil, o que fabricamos, o que facemos é algo relacionado coa cultura, coa identidade do noso pobo”, sentenza ao remarcar o seu traballo.
MOSTRART
En relación ao labor expositivo que promoven, resalta o éxito da feira de artesanía na Coruña, Mostrart, que este ano chega á súa 41 edición. Con 50 expositores galegos e 11 de fóra, recalca que é unha feira “moi consolidada”. “A máis importante de Galicia e das máis importantes que se celebran en toda a península”. Trátase dun evento no que hai artesáns que están durante todo o mes, do 1 ao 31 de agosto, data da súa celebración, a outros que só están unha ou dúas semanas.
COMPETENCIA
Fronte a este tipo de feiras, cuestiona outros eventos promovidos por empresas que non están vinculados a artesáns e lamenta que estea prevalenciendo a súa presenza. Así, apunta ao caso de Vigo no mercado de Nadal e ao que, avanza, ocorrerá este ano na Coruña nesas datas ou o que lles pasou antes en Portonovo.
“Con moito sacrificio e valentía cambiamos un mercado de praia e hippie por un de artesanía e logo esa empresa ocúpanos ese especial enchéndoo de cousas cunha marxe comercial enorme porque son de importación, con pouco valor engadido e moito oportunismo”, indica en relación a este último caso.
Do Concello da Coruña, incide en que “sempre nos apoiou moito”, pero lamenta que sexa unha empresa foránea a que organizará, explica tras unha reunión, o mercado do Nadal en María Pita e engade que, aínda que se lles ofrece a opción de poder estar, sairíalles máis caro. “Non queremos estar nun espazo que nos saca valor”, sostén.
Cuestionado sobre o apoio de administracións como a Xunta, incide en que o hai pero que o seu sector ten que ser “o pepiño grilo pedindo axudas” e para que se regule o sector. “Poden facer máis si, aínda que nos apoian”, sostén.
