A Deputación da Coruña e o Centro de Extensión Universitaria e Divulgación Ambiental de Galicia (CEIDA) renovan un ano máis o seu acordo de colaboración para que a institución provincial financie o Programa de educación, capacitación, divulgación e participación ambiental para a transición ecolóxica durante 2025.
Segundo traslada o ente, o convenio foi asinado este luns polo presidente da Deputación da Coruña, Valentín González Formoso, e o director do Ceida, Carlos Vales.
O mesmo, concreta, recolle unha achega provincial de 90.000 euros, o que representa o 80% do custo da iniciativa. A iniciativa inclúe diferentes actividades relacionadas coa concienciación sobre emerxencia climática, lixo mariño e espazos naturais protexidos, ademais de promover iniciativas sobre capacitación para a transición ecolóxica, programas de divulgación ambiental, asesoramento e plans de comunicación.
Desde 2020 pasaron máis de 171.000 persoas polas máis de 5.500 actividades desenvolvidas polo Ceida. Só no último ano, o centro programou 1.500, logrando atraer a case 48.500 persoas.
