Ir de pé en conexións interurbanas, quedar en terra, esperar e esperar retrasos ou simplemente buses que non pasan… Son circunstancias habituais dos usuarios do transporte público da área metropolitana da Coruña. Así o denuncian centos de usuarios e usuarias que sofren cada día o pésimo servizo e así o traslada, unha vez máis, o Concello de Oleiros á Xunta de Galicia, que ten as competencias na materia en todos os concellos de menos de 50.000 habitantes.

En novembro do pasado ano, o Concello de Oleiros reclamou por escrito á Xunta diversas melloras para o transporte público que continúan sen ser atendidas. Entre outras, o Concello demanda prolongar a liña Entrexardíns-O Seixal ata a Igrexa de Nós; implementar novas liñas para atender as zonas de Franzomel, Abeleiras e Xaz; crear unha liña circular entre Perillo e a Universidade; e reforzar as liñas principais, cando menos en horas punta: as que cubren Dexo, Serantes, Maianca, Dorneda, Liáns e Perill; e a de Oleiros, Montrove e Perillo.

Pero ante as queixas, a Xunta insiste en afirmar que “o sistema detectou correctamente a prestación do 99,5 % dos servizos previstos”. Uns datos que evitan afrontar o problema da calidade do servizo, ofrecendo unha política coa que só se beneficia á empresa concesionaria, xa que nin se ofrece unha calidade mínima nin se atende ás necesidades de desprazamentos da cidadanía

O luns da próxima semana está prevista unha reunión entre Xunta e Concello. “No caso de que o Goberno autonómico persista na súa actitude de ignorar o clamor cidadán para que se mellore o transporte na comarca coruñesa, desde Oleiros farase un chamamento a todos os concellos para organizar unha mobilización conxunta na que esixir á Xunta de Galicia que cumpra coas súas obrigas en materia de transporte”, aseguran.