O Concello da Coruña adxudicou as obras de instalación do valado perimetral do Castro de Elviña. Os traballos consisten na instalación dun sistema de peche do xacemento cunha lonxitude total que se achega aos 1.500 metros. Tal e como trasladou o Goberno local nunha nota de prensa, a empresa adxudicataria foi a construtora López Cao e os traballos contan cun orzamento de 322.000 euros e cun prazo de execución de catro meses. Antes de empezar os traballos, deberá realizarse o estudo arqueolóxico correspondente.
Neste sentido, o valado do recinto é o primeiro paso para dar continuidade ao proxecto impulsado polo Goberno de Inés Rey, co obxectivo de “pór en valor o xacemento máis relevante da cidade”. Así, o peche permitirá impedir o acceso de fauna e aumentar a seguridade, ademais de establecer un control “máis eficaz” nos accesos. Posteriormente, tamén se construirá un centro de apoio ás actividades arqueolóxicas cuxo proxecto se aprobou nos últimos meses. Para os devanditos traballos destínase un orzamento de 330.000 euros.
