O Atlantic Pride, un festival gratuíto celebrado na Coruña con eventos lúdicos, culturais e reivindicativos para visibilizar a diversidade afectiva-sexual sitúase entre os dez festivais mellor valorados polo público e convértese en finalista dos Iberian Festival Awards 2023, segundo confirmou a organización a través dun comunicado.
Este evento foi seleccionado entre máis de 35 propostas de España e Portugal para optar ao galardón Best Medium Sized Festival nos Iberian Festival Awards. O próximo 11 de marzo en Maia, O Porto (Portugal), terá lugar a gala na que nove profesionais do sector de recoñecido prestixio darán o seu veredicto.
A próxima edición do Atlantic Pride, ‘O Orgullo do Norte‘, celebrarase entre o 2 e o 9 de xullo de 2023. A organización destacou a súa “aposta decidida” pola cidade da Coruña como “sede indiscutible do evento”.
