O sindicato UXT asinou un convenio de eficacia limitada para o sector do transporte de viaxeiros na provincia da Coruña, ao que os traballadores poderán adherirse de forma individual, no marco do conflito que se prolonga desde finais de 2025. O texto baséase no preacordo do 2 de febreiro, aínda que incorpora “aclaracións e melloras” respecto dese acordo inicial.

A decisión adoptouse tras unha nova mediación realizada este venres, que a CIG calificou de “teatro inconcluso” e logo da cal convocou unha concentración fronte á estación de autobuses de Santiago de Compostela para este domingo. Desde a UXT defenden que a firma deste acordo “desbloquea” un conflito que se atopaba nunha dinámica de “desgaste, incerteza e confrontación recente” e que a decisión se tomou tras consultar á súa afiliación e en coherencia co exposto en reunións anteriores.

Segundo o sindicato, cada traballador poderá adherirse ao convenio de forma “libre e individual” ata o 1 de maio de 2026, sen obrigacións de ningún tipo, respectando tanto aos que votaron a favor como aos que votaron en contra do preacordo. Entre as condicións do convenio destacan o plus de 8 euros por día en xornada continuada, melloras nos festivos e días especiais (50 euros xeral e 100 euros en días especiais), planificación dos cuadrantes de servizos regulares e escolares con dúas semanas de antelación, mantendo as condicións actuais para xornada partida e dietas de banda horaria.