Este sábado 28 de febreiro, ás 11:00 horas, unha marea de familias percorrerá o treito entre a praza de Ourense e o paseo do Parrote. A Federación Provincial de Centros Públicos da Coruña esrá a mobilizar a medio país para revidincar un sistema educativo público digno.
Ademais de ducias de ANPAS que xa confirmaron a súa presenza, a mobilización conta co apoio da Federación de Asociacións Veciñais da Coruña e Área Metropolitana (FAVA Coruña), que tamén denuncia os problemas que se veñen agravando nos últimos anos e que repercuten directamente na calidade da educación que reciben os nenos e a mocidade. Entre as principais preocupacións sinaladas polos convocantes e que a Federación tamén comparte, destacan:
- Ratios excesivas nas aulas, que dificultan unha atención axeitada e personalizada.
- Profesorado sobrecargado, con crecentes cargas e con recursos cada vez máis insuficientes, o que compromete a calidade dos proxectos educativos.
- Falta de especialistas e de persoal de apoio, imprescindibles para garantir unha resposta adecuada ás necesidades de todo o alumnado.
- Atención insuficiente ao alumnado con necesidades específicas de apoio educativo (NEE e NEAE), que require recursos e profesionais especializados que non sempre están dispoñibles.
- Deficiencias no equipamento dos centros, debido á falta de renovación ou ao avellentamento do mesmo o que xera problemas diarios para a comunidade escolar.
- Carencias de accesibilidade, que seguen a impedir que moitos centros sexan espazos plenamente inclusivos.
Así, as familias piden unha planificación real e eficacia administrativa para poder ter uns recursos humanos suficients, e unhas instalacións coidadas e respectuosas.
Anpas e Afas convocan unha gran protesta na Coruña contra os “parches” na educación pública
Máis novas sobre o Ensino Público
Outras novas das ANPAS
