O xuízo polo apuñalamento mortal do mozo Yoel Quispe, na Noiteboa de 2023 na Coruña, celebrarase do 1 ao 19 de xuño na sección segunda da Audiencia Provincial desta cidade, segundo confirmaron a Europa Press fontes xudiciais. Será despois de que o Xulgado de Instrución número 1 da Coruña decretase a apertura de xuízo oral por asasinato para o tres acusados pola morte de Yoel Quispe, o mozo de 22 anos apuñalado mortalmente na Noiteboa de hai dous anos.
Fronte á postura da Fiscalía, con petición de 14 anos de prisión por homicidio para o único mozo que está no cárcere e de sobresemento da causa para outros dous, a familia defendeu desde o inicio que os tres debían ser xulgados por asasinato. En relación ao seu grao de implicación, o avogado da familia de Yoel Quispe, Adrián Borrajo, considera autor material do asasinato ao mozo que está en prisión e cooperador necesario ao que, segundo esta parte, “levaba a navalla e facilítalla” ao anterior, con implicación tamén dun terceiro.
Así o recolle tamén o auto que sitúa ao presunto autor da puñalada mortal como autor de asasinato; ao segundo como cooperador necesario dun delito de asasinato e ao terceiro como encubridor deste mesmo delito, o que supón unha variación das penas, de até 25 anos de prisión para os dous primeiros, segundo o letrado, e de tres anos para o terceiro. A postura das defensas no procedemento foi, mentres, reclamar o sobresemento. Finalmente, no auto, a titular do xulgado de instrución acordou decretar a apertura de xuízo oral, con Tribujal do Xurado, por asasinato, como expuña a familia, e non por homicidio, como solicitaba o Ministerio Público para un deles.
