O conselleiro de Presidencia, Xustiza e Deportes, Diego Calvo, acompañado pola directora xeral de Mobilidade, Judit Fontenla, asinou co alcalde de Culleredo, José Ramón Rioboo, e coa alcaldesa da Coruña, Inés Rey, un convenio para permitir que poidan prestar servizo de taxi no aeroporto de Alvedro tanto os titulares de licenzas na cidade herculina como en Culleredo.

Desta forma, a partir do 16 de marzo establécese un réxime específico de prestación do servizo de taxi neste aeroporto por parte de ambos os municipios.

Segundo o acordo asinado, o número de taxis que prestarán servizo será de 35, 30 deles con licenza en Culleredo e 5 na Coruña e farano en “igualdade de condicións”. Haberá tamén unha bolsa de taxistas da Coruña, 30 como mínimo, para reforzar o servizo.

Tras a firma, o conselleiro de Presidencia, Diego Calvo indicou que se busca dar resposta á demanda sobre todo en momentos con máis peticións deste servizo e para que actúen “con legalidade” e con “seguridade xurídica”, algo que destacaron tamén desde o sector do taxi.

Á súa vez, o alcalde de Culleredo, José Ramón Rioboo, agradeceu a colaboración do sector para xerar “un bo acordo que poña orde no servizo de taxis”, con implicación de tres asociacións.

As VTC seguen pendentes

Durante a presentación, Calvo, insistiu nas prohibicións fixadas a VTC para operar dentro dun termo municipal mentres que a alcaldesa da Coruña demandou unha regulación autonómica.

O conselleiro de Presidencia insistiu en que “a situación das licenzas de VTC teñen unha serie de condicionantes” e que se lles lembrou “cales son as condicións”. “Non poden operar dentro dun termo municipal salvo que haxa unha regulación específica, operar dentro dun termo municipal está prohibido expresamente”, recalcou.

Fronte a iso, a rexedora coruñesa manifestou que os concellos demandan unha regulación para toda Galicia, cos correspondentes estudos previos.
Ademais, insistiu en que a situación non se soluciona “con sancións” xa que, aseverou, as multinacionais páganas “e seguen”, engadiu sobre os incumprimentos. Por iso, considerou necesario unha regulación autonómica, aínda que aseverou que se non a hai A Coruña fará a súa propia.

Máis novas

Taxistas protestan novamente na Coruña contra os VTC: “Non hai expedientes contra eles”