A Consellería de Educación, Ciencia, Universidades e Formación Profesional negou categoricamente unha redución do investimento nos centros educativos da Coruña. O departamento autonómico respondeu así ás críticas da alcaldesa, Inés Rey, quen denunciara un recorte do 50% e reclamara maior implicación da administración galega ante os problemas detectados nas escolas.
A Xunta cualificou de “falsas” as acusacións da rexedora e cifrou en 24 millóns de euros o investimento que se está a executar nun cento de obras de modernización e rehabilitación en preto de 40 centros da cidade, todo isto baixo o marco do Plan de nova arquitectura pedagóxica.
COMPETENCIAS E “RÉDITOS ELECTORAIS”
Desde o departamento autonómico instaron á alcaldesa a revisar o acordo coa Fegamp no marco do Pacto Local, onde se delimita que as tarefas de conservación e mantemento dos centros de Infantil e Primaria son responsabilidade do Concello. A Xunta sostén que a “falta de mantemento continuada no tempo” por parte do equipo de goberno local é o que acaba derivando en graves problemas estruturais.
Como exemplo, a Consellería sinale que a falta de limpeza de canlóns e baixantes, especialmente nun inverno tan chuvioso como o de 2026, provoca que moitos teitos acaben colapsando. O Goberno galego acusou a Inés Rey de “botar balóns fóra” desde o despacho de María Pita e de actuar pensando unicamente en “réditos electorais” en lugar de velar polo beneficio da comunidade educativa coruñesa.
