A asociación cultural O Mural solicitou que a Xunta e o Concello da Coruña informen sobre o estado dos murais de Urbano Lugrís, situados na rúa Olmos, tras o paso das últimas borrascas. A entidade denuncia que a “ausencia de actuacións de protección” só serve para agravar o estado “moi deficiente” no que se atopan as pinturas, unha situación que xa fora acreditada por unha restauradora contratada polo consistorio hai máis de catro anos.
O colectivo alerta de que o forte vento e o gran volume de precipitacións fan temer pola persistencia destes frescos, dado o mal estado do edificio no que se atopan. Por este motivo, solicitou formalmente información e a adopción urxente de medidas para salvar definitivamente esta obra, que foi declarada Ben de Interese Cultural o ano pasado na cidade herculina.
