A Policía Local de Culleredo localizou a un grupo de oito rapaces omo presuntos autores de pintadas no interior dos Muíños de Acea de Ama, aos que supostamente accederon forzando a entrada. Tal e como trasladou o Concello de Culleredo nunha nota de prensa, os feitos ocorreron o pasado luns pola tarde, dentro da campaña de control e vixilancia que exercen os axentes sobre os bens patrimoniais municipais.

Á súa chegada aos Muíños de Acea de Ama, a patrulla sorprendeu de entrada a catro mozos, menores de idade, xunto con sprays de pintura, rotuladores permanentes, tabaco, utensilios para vapear e bebidas alcohólicas de alta gradación. Dentro da edificación, cuxa entrada estaba forzada, observaron numerosas pintadas con diferentes firmas. Ademais, un dos mozos “tiña manchas de pintura na man e na cara”.

Durante a intervención, chegaron outro catro rapaces máis, tamén menores de idade. Un deles portaba unha mochila con outro catro botes de pintura e outra levaba un paquete de tabaco “asinado de forma similar a unha das pintadas atopadas nas paredes”. A Policía Local identificou os oito presuntos responsables e deu aviso aos seus pais. Aínda que inicialmente negaron os feitos, aos poucos “foron ofrecendo diferentes graos de colaboración cos axentes”. Con todo, as actuacións foron trasladadas á Garda Civil para que poida dar conta á Fiscalía de Menores.