A Xunta deu luz verde ambiental ao proxecto para a instalación dun centro de almacenamento e valorización de residuos informáticos, no parque empresarial de Almeiras-A Marisqueira, en Culleredo (A Coruña).

O informe de impacto ambiental (IIA) emitido pola Consellería de Medio Ambiente e Cambio Climático indica “non son previsibles efectos adversos significativos derivados do proxecto sempre que se cumpra cos condicionantes fixados”.
Unha vez emitido o IIA, que non exime ao promotor da a obrigación de obter todas as autorizacións, licenzas, permisos ou informes que resulten esixibles, remitiuse a resolución ao órgano substantivo e proximamente será publicada no DOG e na páxina web da Consellería.

O proxecto consiste na instalación dun centro xestor de almacenamento e valorización de residuos non perigosos que se situará no interior dunha nave que o promotor xa posúe no parque empresarial de Almeiras-A Marisqueira.

Concretamente, as operacións a desenvolver serán o almacenamento de residuos de aparellos eléctricos e electrónicos (RAEE), como pantallas de computador e impresoras; así como o almacenamento e valorización de compoñentes informáticos e cartuchos de tinta e tóner.

Así, o promotor, Ridel Noroeste SL, estableceu que a capacidade normal de tratamento na instalación será de 43 toneladas ao ano e a máxima será de 54,75 toneladas ao ano, considerándose a capacidade máxima puntual de almacenamento de 14,05 toneladas.