Celebrouse esta mañá de luns 13 de abril unha Concentración no Centro de Saúde de San Xosé, polo Día Internacional da Atención Primaria. Convocada pola plataforma SOS Sanidade Pública, xuntou a ducias de persoas que reivindicaron a importancia dos centros de saúde e os médicos de familia no sistema sanitario galego.
Un dos voceiros da Plataforma, Ramón Veras, incide na importancia da Atención Primaria, qeu adoita ser calificada de “fundamental” tamén para o goberno, pero sen corresponderse despois co apoio real en investimento.
Veras, médico de familia xubilado dende o ano pasado, lembra que “se falla a Primaria o paciente non ten defensa dentro do sistema”. Percibe unha fonda “preocupación entre a xente hai, outra cousa”, recoñece “é que se mova máis ou menos”. Con todo, valora que “todo aquel que por desgraza ten que buscar unha asistencia teno cada vez complicado, tanto en Primaria como en Hospitalaria, onde ademais cada día é unha atención máis pechada”.
Lembrou os meses de folga na Atención Primaria, lamentando o pouco tempo do que dispoñen os bos profesionais para desenvolver o seu traballo, dando conta de que “se tes un médico de familia qe non te coñece, estás perdido”.
É crítico coa Xunta. “A Consellería parece que no debate parlamentario dixo que ía reforzar a estrutur e que vai facer “outro grupo de traballo”. Levan 17 anos gobernando, e só imos a peor. Cando chegaron había xerencia exclusiva de Primaria, pero delegaron á Xefatura de Área que sempre por por diante a atención Hospitalaria”, lamenta.
MANIFESTO NO DÍA DIA INTERNACIONAL DA ATENCIÓN PRIMARIA.
A ATENCIÓN PRIMARIA DEBE MELLORAR A SAÚDE DA POBOACIÓN E A RACIONALIDADE DO SISTEMA SANITARIO, PERO CARECE DO APOIO POLÍTICO NECESARIO PARA SOBREVIVIR
Os sistemas sanitarios orientados á Atención Primaria teñen unha maior esperanza de vida, menores taxas de mortalidade, mellor control das enfermidades crónicas e garanten un funcionamento eficiente do resto do sistema sanitario.
Porén, a Atención Primaria en Galicia atravesa unha grave crise por falta de apoio político e de recursos suficientes. Son ben coñecidos os problemas para contactar cos centros de saúde, as longas esperas para recibir atención, a substitución das consultas presenciais por telefónicas, as dificultades nas interconsultas hospitalarias e a carencia de profesionais necesarios para ofrecer unha atención integral baseada na promoción, prevención e atención comunitaria.
A espera media para acceder aos centros de saúde supera os 10 días, chegando en moitos casos a máis de 15 días; milleiros de nenas e nenos carecen de pediatra; e o persoal abandona a Atención Primaria pola precariedade laboral, mentres se incorporan profesionais sen formación especializada, poñendo en risco o modelo sanitario público.
Como consecuencia deste deterioro, dispáranse os casos graves, colapsan as urxencias hospitalarias, empeora o prognóstico das enfermidades e aumenta o sufrimento das persoas, ao tempo que se favorece o recurso á sanidade privada.
Dende a Plataforma SOS Sanidade Pública Costa da Morte denunciamos o proceso de desmantelamento que está a sufrir a Atención Primaria na nosa comarca.
A falta de profesionais é alarmante, especialmente no caso da pediatría, o que obriga a que as nenas e nenos teñan que desprazarse fóra do seu concello para seren atendidos. Esta situación é inaceptable e evidencia o abandono do rural por parte da administración sanitaria.
As listas de agarda para unha consulta médica superan incluso os 15 días, impedindo unha atención axeitada e a tempo. A política sanitaria do señor Rueda non lle dá ningunha prioridade ao rural, deixando centros de saúde, como o de Zas, con prazas médicas sen cubrir e sobrecargando ao único profesional dispoñible.
A Atención Primaria necesita cambios e melloras para saír da crise. Dende a Plataforma SOS Sanidade Pública de Galicia, esiximos:
- 1. Incrementar os recursos da AP ata o 25% do orzamento sanitario (está no 14%).
- 2.- Garantir a accesibilidade, e a continuidade asistencial con máis profesionais: Medicina de Familia, Pediatría, Enfermaría, Saúde Mental, Fisioterapia, Traballo Social, Saúde Buco Dental, Logopedia, Persoal Administrativo, Matronas, entre outros, para dar unha Atención Integral nos Centros de Saúde.
- 3.-Unha política de persoal xusta e incentivadora, con oposicións anuais ata completar as prazas vacantes na actualidade.
- 4. Combater o abuso da medicalización e a burocracia innecesaria.
- 5. Reorientar a atención primaria cara á Saúde en lugar da enfermidade, desenvolvendo estratexias de saúde comunitaria.
- 6. Que a atención que se presta dende a Hospitalización a Domicilio (HADO), sexa por criterios sanitarios e non por distancia ao Hospital de Referencia. Por riba de estar máis lonxe do Hospital non reciben este servizo.
- 7. Asegurar a formación e a investigación de calidade en todas as categorías de persoal.
- 8. Incentivar a Participación Cidadá, ca posta en marcha do Consello de Saúde de Galicia e os Consellos de Saúde de Área Sanitaria.
- 9. Prestar especial atención á saúde mental e ás persoas maiores.
