Representantes da Comisión pola Recuperación da Memoria Histórica da Coruña (CRMH) reclamaron ao goberno local da cidade herculina a retirada de simboloxía franquista, en cumprimento da Memoria Democrática, á vez que destacaron, segundo informaron, a incoación de dilixencias procesuais por parte da Fiscalía de Dereitos Humanos e Memoria Democrática.
Así o informaron, nunha rolda de prensa, na que explicaron que en febreiro unha delegación da xunta directiva solicitou a esta Fiscalía, con sede en Ferrol, a súa intervención ante o que consideran “incumprimentos constantes” por parte do Concello da Coruña en materia de retirada de elementos e símbolos “contrarios á memoria democrática”.
Neste sentido, apuntaron que achegaron á Fiscalía documentación sobre os acordos adoptados polo Consello da Memoria Democrática, en base ao informe encargado ao Instituto José Cornide de Estudos Coruñeses no ano 2019 pero que, engadiron, non se están cumprindo.
“Hai un incumprimento reiterado”, sinalou o presidente da CRMH da Coruña, Carlos Babío, en relación á retirada de simboloxía franquista sobre a que ademais, dixo, que debe ampliarse e actualizarse. “É vital para avanzar no modelo de liberdades e convivencia”, aseverou, á súa vez, Beatriz Parga, secretaria da CRMH da Coruña para quen é “preocupante” o “incumprimento” e que se tivo que recorrer á Fiscalía.
