O Concello de Culleredo aumentará, a partir deste luns, a vixilancia sobre o servizo de taxis do aeroporto de Alvedro tras observar incumprimentos na bolsa de reforzo disposta polo aumento de voos temporal. Esta situación deuse ao ter que asumir a maioría de rutas de Lavacolla, que permanecerá pechado por obras ata finais de maio.
O sistema establecido persegue que, de forma permanente, haxa tres taxis en parada procedentes da bolsa, segundo un comunicado emitido pola Alcaldía, que lembra que “non é correcta“ a substitución continua de vehículos. Desta forma, axentes da Policía Local procederán a corrixir estas situacións e a asegurar o cumprimento estrito da ordenación prevista.
O Concello lembra que, conforme ao convenio vixente, a entrada desde a bolsa debe realizarse en grupos de tres vehículos como máximo e unicamente cando a parada quede sen taxis de quenda. Isto implica a saída de tres vehículos sen que se incorporen novos ata que a parada quede baleira, momento no que deben saír outros tres profesionais.
Doutra banda, a Policía Local atendeu á evolución da nova situación operativa do aeródromo e constatou en termos xerais un funcionamento adecuado do servizo. No entanto, os axentes detectaron “carencias relevantes” no que respecta ao servizo de bus metropolitano, así como a necesidade dunha mellor ordenación da sinalización no exterior do aeroporto para facilitar a mobilidade e a seguridade dos usuarios.
