Xornada de loita laboral ás portas da fin de semana. Os sindicatos CCOO, CIG, UXT e USO veñen de convocar de xeito conxunto unha xornada de folga en todo o sector do comercio de alimentación da provincia da Coruña para este venres 29 de maio. Esta medida de protesta chega despois de varios meses de negociacións infrutuosas nas que, tense evidenciado unha total falta de interese por parte da patronal para mellorar as condicións laborais e salariais dos miles de persoas afectadas por este convenio colectivo.
A través dunha nota de prensa, o sindicato UXT afeou a postura de absoluto inmobilismo mantida pola representación empresarial ao longo de todo o proceso. A central acusou de forma directa os empresarios de negarse en redondo a asumir propostas básicas que permitan á plantilla recuperar o poder adquisitivo perdido, así como avanzar en medidas de conciliación familiar ou dignificar unhas condicións de traballo que cualifican como cada vez máis deterioradas nun sector esencial para a sociedade.
REIVINDIACIÓNS SALARIAIS CO IPC REAL
No que respecta ás demandas económicas, a CIG detallou nun comunicado as liñas vermellas fixadas polo bloque sindical. Entre as principais esixencias destacan unha proposta de subida salarial do 10% para este ano 2026, seguida dun incremento do 4,5% de cara ao ano 2027 e dun 4% para o exercicio de 2028. Os representantes dos traballadores consideran irrenunciable que todos estes aumentos conten cunha cláusula de revisión salarial anual que atenda ao IPC real para evitar novas perdas económicas.
A respecto da situación financeira das plantillas, as forzas sindicais alertaron de que o sector arrastra unha perda continuada de poder adquisitivo, provocando que na actualidade unha gran parte dos salarios apenas superen a contía do Salario Mínimo Interprofesional (SMI).
As plataformas reivindican avances noutros dereitos laborais urxentes, tales como unha redución substancial da xornada laboral anual, melloras na cobertura económica das baixas por Incapacidade Temporal (IT), e o establecemento de pluses específicos por antigüidade ou por traballar en domingos e festivos.
CONCENTRACIÓNS EN CATRO GRANDES VILAS
Co obxectivo de visibilizar o conflito e paralizar a actividade comercial nas grandes superficies e tendas de barrio, durante a xornada do venres desenvolveranse diversas mobilizacións de protesta en varios puntos estratéxicos da provincia. En concreto, os sindicatos confirmaron que haberá concentracións nas rúas da Coruña, Ferrol, Santiago de Compostela e Ribeira.
Finalmente, as organizacións convocantes fixeron un chamamento unitario á participación activa de todo o persoal do sector. As centrais insisten en que a mobilización masiva é a única ferramenta para defender un convenio digno que recoñeza o esforzo diario das traballadoras e permita avanzar de xeito real en dereitos laborais e salariais estables.
