A Policía Local de Culleredo investiga varias verteduras ilegais realizadas na instalación municipal ‘A Garrocha’ e apunta a que os residuos proceden de obras e reformas executadas noutros municipios veciños. Segundo trasladaron a través dunha nota de prensa, os axentes comprobaron que o peche do recinto municipal estaba forzado, o que habilitaba o acceso directo en vehículo ao interior do espazo para depositar os materiais.

Tras revisar os restos, os efectivos policiais analizaron que o material procedía na súa maioría de reformas de inmobles situados en locais e vivendas da Coruña e nunha vivenda de Arteixo. A localización da orixe foi posible porque, entre os refugallos, a Policía atopou documentos identificativos de particulares e de empresas. Ademais, entre os residuos localizados especificáronse mobles vellos, cascallo, restos de material de obra como pintura e diversos aveños de todo tipo.

O Concello de Culleredo avanzou que procederá á retirada inmediata de todos os residuos da instalación municipal unha vez se dispoña de todas as probas e indicios necesarios para tramitar a correspondente sanción por estas infraccións medioambientais.