Tecendo xa camiños para as Eleccións Municipais de 2027, os grupos de Sumar, Esquerda Unida e Podemos veñen de enviar a segunda nota de prensa conxunta. E de novo, o asunto escollido polos 3 grupos para seguir amosando “as boas relacións” que imperan entre as asembleas locais dos partidos, volve ser a situación económica do Concello.
Os 3 grupos, que avanzan na formulación dunha candidatura conxunta de cara ao ano que vén para “traballar por un proxecto de cidade” común, denuncian que o Goberno local da Coruña deixou sen executar partidas para colexios, bibliotecas e instalacións deportivas.
Trinidad Palacios (Sumar), Berta Vigil (Esquerda Unida) e Aitor Neira, (Podemos), manteñen a mesma “preocupación” tras coñecer novas informacións sobre os investimentos orzamentarios municipais de 2025, que revelan que “o Goberno local deixou sen executar partidas destinadas a colexios, bibliotecas, instalacións deportivas, escolas municipais, o programa Lecer e o mantemento dos espazos verdes da cidade”.
“Cando quedan sen executar partidas destinadas ao programa Lecer, ás escolas municipais, ás bibliotecas públicas, ás instalacións deportivas ou ao mantemento dos espazos verdes, o que se evidencia é unha incapacidade para converter os recursos dispoñibles en melloras reais para a cidadanía”, sinala Trinidad Palacios, coordinadora de Movemento Sumar Coruña.
Pola súa banda, Berta Vigil, membro da colexiada de Esquerda Unida, afirma que “a cuestión non é se había diñeiro, porque o había. A cuestión é por que ese diñeiro non chegou aos servizos e equipamentos que utilizan diariamente milleiros de coruñesas e coruñeses. Esa é a pregunta que o Goberno local debe responder”.
Para Aitor Neira, voceiro de Podemos Coruña, “se existen necesidades nos barrios, nos centros educativos, nos equipamentos deportivos ou nos servizos municipais e, ao mesmo tempo, quedan recursos sen executar, é evidente que hai un problema de xestión. Un orzamento só ten valor cando se transforma en feitos”.
Ante todo isto, as tres organizacións piden “unha maior capacidade de execución e planificación para garantir que os investimentos aprobados cheguen realmente á veciñanza e contribúan a mellorar os servizos públicos e os barrios da cidade”.
Máis novas
O BNG condiciona o seu apoio ao PSOE a buscar “unha solución para o buraco económico” nas contas
