A Deputación da Coruña e Next Educación promoven o curso de especialista en territorio rural intelixente, segundo informaron os seus respectivos presidentes, Valentín González Formoso, e o xornalista Manuel Campo Vidal.

Esta formación, dirixida polo propio Campo Vidal, pretende axudar a impulsar a dixitalización e a economía circular nos núcleos rurais a través da implementación nos negocios de diferentes ferramentas tecnolóxicas e técnicas para conseguir o seu desenvolvemento.

O dirixente provincial apuntou que “desde as institucións, principalmente as de carácter local, impulsamos estes cursos para dotar de instrumentos ao mundo rural coruñés e conseguir a súa dinamización”.

Por outra banda, o departamento de Cultura da Deputación da Coruña destina medio millón de euros para financiar as actividades de fundacións e entidades persoais sen ánimo de lucro a titulares de museos, centros de interpretación ou bibliotecas.