Levan anos sendo foco de problemas laborais, en boa medida pola caducidade dos seus contratos. Así, é unha moi boa nova a licitación a xestión dos centros deportivos de San Diego e O Castrillón. A concesión será por un período de 30 anos sen posibilidade de prórroga.
Ademais da mellora da oferta deportiva nestes complexos, o futuro adxudicatario deberá comprometerse a facer investimentos de remodelación importantes, especialmente no Centro Deportivo de San Diego, por unha contía non menor de 676.799 euros o primeiro ano e con novas intervencións de modernización do material e das instalacións cada cinco anos, investindo ao menos 200.000 euros en cada quenda, nos anos 6, 11, 16, 21 e 26 da concesión.
En total, ao longo dos 30 anos de concesión, estímase que o investimento en ambos os centros rondará os 6,5 millóns de euros.
A concesión preséntase como un lote único para a xestión de ambos os centros.
Ademais dunha programación de actividades o máis ampla e diversa posible, terase en conta na avaliación das ofertas os proxectos que garantan as mellores condicións laborais do persoal dos centros, coa subrogación da plantilla actual e apostando pola formación e os dereitos dos traballadores e traballadoras.
Entre as melloras establecidas figura tamén unha ampliación do horario de atención ao público, de tal xeito que no canto de abrir as portas ás 08.00 horas, como actualmente, empezarán a dar servizo ás 07.00, unha hora máis que lles facilitará a moitas persoas que traballan con horarios de mañá que poidan tamén acudir ao ximnasio a primeira hora cando ata o momento non podían facelo.
Novas relacionadas
Preguntan pola caducidade de varias instalacións deportivas municipais da cidade
Actuais traballadores do CD Castrillón expoñen a súa incredulidade
Esixen que o goberno local tutele o funcionamento do Centro Deportivo do Castrillón
