O investimento realizado pola Consellería de Medio Rural en materia de prevención de incendios forestais na provincia da Coruña supera este ano os 2,2 millóns de euros. Así o destacou este martes a titular deste departamento, María José Gómez, nunha visita a actuacións preventivas que se están levando a cabo no concello de Ortigueira, na parroquia de Espasante, e na que estivo acompañada polo director xeral de Defensa do Monte, Manuel Francisco, polo director-xerente de Seaga, Martín Martínez, e polo alcalde da localidade, Valentín Calvín.

Así, ao amparo do convenio de xestión da biomasa asinado entre a Xunta e Seaga desenvolvéronse actuacións en vías de titularidade municipal nunha superficie aproximada de 180 quilómetros no territorio provincial e executáronse traballos de mellora de pistas forestais e limpeza de devasa mediante o emprego de maquinaria. Este labor supuxo unha achega aproximada de 455.000 euros.

Por outra banda, as accións preventivas directas realizadas pola propia Consellería, tales como a creación de áreas devasas, fajas auxiliares de pista ou tratamentos silvícolas, supuxeron un desembolso aproximado doutros 1,8 millóns de euros na provincia, con obras executadas ou en fase de execución durante este ano. No que respecta a Ortigueira en particular, actualmente levan a cabo actuacións de reparación e mellora de infraestruturas forestais mediante maquinaria pesada, como motoniveladora, pa mixta e bulldozer. Ata agora, estas intervencións abarcan uns 26 quilómetros de pistas e está previsto continuar executando melloras nas próximas datas, tal e como avanzou a conselleira.

En total, o investimento preventivo en Ortigueira aproxímase aos 200.000 euros, contabilizando tratamentos preventivos, traballos con investimento directo da Consellería, os fondos do convenio con Seaga e novas pistas. Precisamente este último aspecto, foi destacado pola conselleira. “É moi importante telos abertos, tanto para a veciñanza como para os servizos de Defensa do Monte se fose preciso”, destacou.