O Concello da Coruña sacou a contratación un servizo de xestión das colonias felinas urbanas mediante un software que permita controlar as poboacións, para garantir así o seu benestar e minimizar posibles problemas de limpeza urbana. Tal e como trasladou o Goberno local en nota de prensa, a necesidade do contrato nace da obrigación, imposta pola Lei de protección dos dereitos e o benestar dos animais, de que os concellos sexan os responsables de xestionar as colonias felinas de cada municipio e apliquen o método CER (Captura, Esterilización e Retorno).

Neste contexto, o software do novo contrato, cun orzamento de 25.000 euros e unha duración de tres anos, deberá incluír un mapa interactivo que permita visualizar o estado xeral das colonias felinas e a súa geolocalización. Ademais, o programa permitirá clasificar as colonias, obter información de cada exemplar a través dos microchips e xestionar as queixas e incidencias que poidan xurdir. Desta maneira, os eixos do programa serán, por unha banda, o seguimento detallado do protocolo CER e, por outra, a xestión das persoas colaboradoras na xestión das colonias, diferenciando entre asociacións, persoal veterinario asignado e persoas alimentadoras.