O reitor da Universidade da Coruña (UDC), Ricardo Cao, asinou este luns os novos nomeamentos correspondentes a catro vicerreitorías e á xerencia, no marco da reorganización do equipo de goberno anunciada o pasado mes de xuño. Segundo informa a institución académica, esta reorganización, que será efectiva desde este martes, día 1, cando os novos titulares tomen posesión, “permitirá encarar con máis forza e novo pulo a segunda metade do mandato, coa vista posta en 2030“.

Neste sentido, a principal novidade será a creación da Vicerreitoría de Estratexia Dixital e Intelixencia Artificial. Esta nova área, concreta, “nace coa vontade de situar no centro da acción de goberno a planificación estratéxica do uso das tecnoloxías dixitais, nomeadamente o uso da intelixencia artificial”.

“O obxectivo é afrontar este reto desde unha dobre perspectiva: por unha banda, como administración pública que debe mellorar de maneira continua os seus procesos e servizos; e, pola outra, como universidade comprometida coa xeración de novo coñecemento científico e tecnolóxico e coa súa transmisión á sociedade”, apunta.