A Asociación de Supermercados da provincia da Coruña puxo en cuestión que se manteñan as convocatorias de folga no sector do comercio de alimentación, tras a celebrada onte. Tamén denuncia “tentativas de bloqueo, presións aos traballadores e impedimentos aos clientes para facer as súas compras durante a folga”.

A asociación cuestiona que se prolongue un conflito “que acumula xa 14 xornadas de folga, malia que as empresas parten de salarios superiores aos de case todos os seus competidores e ofrecen, ademais, melloras superiores ás aceptadas polos mesmos sindicatos nestes e noutros convenios”.

A entidade considera difícil entender que se fale dunha posible folga no Nadal “cando hai sobre a mesa unha proposta que permitiría pechar o convenio”. A oferta, sostén, inclúe “un incremento salarial do 4% en 2026 e do 12,2% acumulado en catro anos, mecanismos de protección fronte ao IPC, unha nova promoción profesional que supón un 2% adicional e unha redución progresiva da xornada”.