A néboa provocou na mañá deste xoves desvíos e atrasos no aeroporto coruñés de Alvedro. Segundo informaron fontes de Aena, o voo de Air Europa procedente de Madrid, que debía aterrar na Coruña ás 7.05 horas, acabou sendo desviado a Santiago. Pola súa banda, o de Vueling procedente de Barcelona, que tiña previsto aterrar ás 7.25 horas, foi desviado a Madrid.

O voo de Iberia que tiña previsto aterrar ás 8.40 horas na cidade herculina saíu da capital española con máis dunha hora de atraso e finalmente tamén foi desviado a Madrid, onde aínda non aterrara no momento de facilitarse a información. Ademais destes desvíos, algúns dos voos que debían saír a primeira hora de Alvedro sufriron atrasos. É o caso da conexión de Vueling con Barcelona, que saíu con tres horas de demora, ou dos voos de Iberia con destino a Madrid previstos para as 8.35 e as 9.20 horas.