A Federación de Servizos de Comisións Obreiras (CC.OO.) mobilizouse este xoves na Coruña para esixir ao sector bancario melloras nas condicións laborais do seu persoal, con concentracións diante de oficinas de CaixaBanck, BBVA, Banco Santander, Banco Sabadell e Abanca.
Nun comunicado, o sindicato criticou que, mentres a banca española pechou 2025 con máis de 36.000 millóns de euros de beneficios, segue medrando a presión comercial sobre os seus empregados, ao tempo que se rexistra un deterioro do ambiente laboral, segundo unha enquisa realizada por CC.OO. Con berros de “Moito beneficio, o noso sacrificio” ou “Abonda xa de presións sobre o persoal”, CC.OO. reclama subas salariais, máis tempo para a vida persoal, relevo xeracional e creación de emprego no sector.
Tamén se demanda unha retribución variable “xusta, transparente e negociada” e “garantías reais” fronte ao impacto da intelixencia artificial, entre outras peticións. Por todo isto, o sindicato continuará coas súas mobilizacións o vindeiro 4 de novembro, no marco da campaña de presión ao sector financeiro.
