Os produtos do campo e do mar de Galicia terán unha presenza destacada no Fórum Gastronómico que se celebrará en Expocoruña entre o 25 e o 27 de setembro.

A Xunta, a través da Axencia Galega dá Calidade Alimentaria –da Consellería de Medio Rural–, e da Consellería do Mar, participará neste evento con preto de 40 empresas coexpositoras do sector agroalimentario.

As ao redor de 30 empresas que acoden ao Fórum baixo o paraugas de Medio Rural ofrecerán unha completa representación de produtores variados: adegas, queixos, xeados, galletas ou mel, entre outras referencias de calidade. Cada unha destas empresas disporá dun espazo personalizado de seis metros cadrados repartidos en cinco illas de 36 metros cadrados.

Ademais, este espazo institucional contará cunha área específica para actividades gastronómicas, a aula de Experiencias, así como cun túnel do viño onde estarán representadas máis de 70 referencias de viños, augardentes e licores da comunidade.

Nesta aula están programadas, para o tres días do evento, unha serie de actividades dirixidas por persoal dos consellos reguladores dos produtos con indicativos de calidade diferenciada e da propia Axencia. Así, haberá catas-degustación de produtos galegos con indicativo de calidade e celebraranse varias exhibicións (showcookings) con preparacións culinarias a base destes produtos, dirixidas por especialistas do mundo da restauración.

Doutra banda, a Xunta e os consellos reguladores participarán tamén no espazo Ágora do Fórum, cunhas presentacións e elaboracións dirixidas e comentadas por profesionais.

Pola súa banda, a Consellería do Mar estará presente neste evento cun expositor de 160 metros cadrados no que se difundirá a campaña ‘Galicia sabe amar’ e albergará a oito empresas coexpositoras. Durante os días que dura este encontro organizará distintas actividades de degustación, entre elas una cos produtos certificados baixo o selo de calidade pescadeRías, que será no espazo taller, e outra con conservas de produtos do mar, que se celebrará na aula Ágora.