O secretario de Pesca do PSdeG provincial da Coruña, Walter Pardo, enviou unha carta ao ministro de Agricultura, Pesca e Alimentación, Luís Planas, para trasladarlle a preocupación existente en Galicia pola situación da frota do cerco en relación coa cota de sardiña. O socialista advirte de que algúns armadores xa esgotaron a súa cota e non poden continuar pescando, a pesar de que existe recurso e demanda nas lonxas.

Pardo considera esta situación “difícil de entender” e sinala que existen posibilidades de pesca que non sempre se consumen na súa totalidade noutras zonas. Por iso, defende revisar se o actual sistema de distribución responde realmente ás necesidades da frota e permite aproveitar de forma eficiente unha cota que, segundo subliña, pertence ao conxunto do Estado.

O responsable socialista reclama que o debate non se limite á cantidade que corresponde a cada territorio e pide analizar o funcionamento global do sistema. Neste sentido, aposta por establecer mecanismos que permitan que as cotas que non vaian ser utilizadas poidan ser aproveitadas por outras frotas, ademais de revisar a propia distribución da cota entre as distintas embarcacións.

Entre as propostas trasladadas ao ministerio figura analizar o consumo real da cota de sardiña, determinando canto se utiliza cada ano, que parte queda sen consumir e en que momentos da campaña se produce esa dispoñibilidade. Ademais, Pardo propón estudar unha cota global para o conxunto da frota, en lugar dunha cota individual e inamovible para cada barco, vinculando o acceso á capacidade da embarcación, o número de tripulantes e os días efectivos de actividade.