Parlamentarios europeos mantiveron este luns, na Coruña, unha reunión co vicepresidente segundo e conselleiro de Economía, Industria e Innovación, Francisco Conde, e a alcaldesa herculina, Inés Rei, na que abordaron as actuacións en Galicia para alcanzar unha transición enerxética “xusta”.

Fixérono na visita dunha delegación da comisión de Industria, Investigación e Enerxía do Parlamento europeo, que estará en España ata o 21 de setembro para comprobar os desafíos aos que se enfronta a industria respecto da transición enerxética, con exemplos concretos en Galicia e Asturias.

O obxectivo da visita foi analizar os retos industriais nun escenario de transición enerxética e de elevados prezos da enerxía, así como comprobar ata que punto as enerxías renovables son un elemento fundamental para impulsar a industria, o crecemento económico e a poboación.

A delegación estivo presidida polo eurodeputado Jens Geier (S&D, Alemaña), quen explicou que visitarán industrias e instalacións que “consomen moita enerxía”. “E imos observar a transformación que se está facendo no noroeste de España para descarbonizar a industria”, apostilou. “Estamos moi expectantes”, dixo tamén sobre a visita programada.

ACTUACIÓNS EN GALICIA

Pola súa banda, o conselleiro de Economía aludiu ao obxectivo da Xunta de avanzar cara á neutralidade climática no ano 2050, cun proceso “planificado” e “xusto” desde o punto de vista do impacto no emprego e do impacto territorial.

“Un reto de medio e longo prazo”, sinalou o conselleiro, quen indicou que Galicia está a avanzar “en vectores de enerxía renovables que poidan substituír a enerxías vinculadas a fósiles e hidrocarburos que forman parte doutro modelo”.

Ademais, recalcou que Galicia está “a cumprir os obxectivos do desenvolvemento das renovables”. “Pero temos retos desde o punto de vista industrial e enerxético e aí estamos a traballar en novos vectores que a delegación coñecerá, tanto no hidróxeno renovable como o biometano como a propia eólica mariña”.

Todo iso, dixo, co obxectivo de avanzar cara a “un proceso de transición planificado e xusto desde o punto de vista do emprego e que abra novas oportunidades desde o punto de vista industrial”

Pola súa banda, a alcaldesa incidiu na necesidade de que se “escoite” ás administracións locais. “Somos axentes directos nun modelo de transición xusta”, manifestou Inés Rei, quen pediu que non se centre só na industria senón tamén en novas formas de mobilidade.

Así mesmo sostivo que este tipo de transición debe de ir da man de políticas de emprego e laborais tamén “xustas”, de forma que “non deixen a ningún traballador atrás”. “Hai que atender a toda a man de obra que leva moitos anos dedicándose a un modelo industrial que está a cambiar e reconvertelos”.