A sección segunda da Audiencia Provincial da Coruña celebrará os días 2 e 3 de novembro, ás 10,00 horas, o xuízo contra unha muller que foi tesoureira dunha empresa acusada de apropiarse de 1,2 millóns, segundo informa o Tribunal Superior de Xustiza de Galicia (TSXG).
De acordo coa cualificación fiscal, a muller desempeñou esta función entre 2008 e 2019, data na que foi despedida. Ente outras funcións, era a encargada de remitir ordes de transferencia ás entidades bancarias, do control dos saldos bancarios, comprobación de ingresos e gastos e elaboración de partes alos bancos.
“Así, dado que a empresa confiara na acusada para xestionar a súa contabilidade proporcionándolle acceso a documentación e contas bancarias, esta, prevaléndose de tal posición, durante os anos 2011 a 2018, elaborou ordes de transferencia ficticias e de aparencia similar ás emitidas” para transferilo a outra conta da que ela era titular.
Para iso, sostén Fiscalía, “utilizaba aplicacións informáticas onde insería de forma escaneada as firmas dos autorizados para emitir as ditas ordes, así como o selo da empresa”. “Nas citadas ordes, constaban formalmente como beneficiarios provedores habituais da empresa cando, en realidade, ditas operacións non eran reais e o beneficiario único e destinatario da transferencia era a propia acusada”.
Con esta mecánica, “a acusada efectuou no período sinalado 341 transferencias por un importe total de 1.232.886,71 euros”, aínda que o Ministerio Público indica que a cantidade total “coa que se fixo en proveito propio foron 1.224.851,13 euros”. Por estes feitos, figura tamén como acusado o seu marido xa que o Ministerio Público indica que dispuñan del de “común acordo”.
Entre os gastos efectuados figuran artigos de luxo, centos de pezas de roupa con etiqueta, colección de reloxos, xoias, bixutaría e documentación de viaxes en hoteis de luxo e cruceiros.
Fiscalía considera os feitos constitutivos dun delito continuado de falsidade en documento mercantil en concurso medial cun delito de estafa no caso da muller e do home doutro de estafa ou, no seu caso, de branqueo por imprudencia grave. Para ela, pídense seis anos de cárcere e para el cinco anos ou dous anos de prisión en función do delito.
