BNG e a Marea Atlántica reprocharon ao goberno local da Coruña a “ausencia” dunha proposta de orzamento para 2023, segundo expuxeron en senllas comparecencias.

En rolda de prensa, a Marea Atlántica presentou dez propostas de “mínimos” para abrir a negociación das contas do próximo ano. Como medida de “vontade de diálogo”, reclamaron tanto a portavoz municipal, María García, como o candidato á Alcaldía, Xan Xove, o desbloqueo de medidas en materia de vivenda, mobilidade, enerxía, xustiza social e equipamentos para os barrios.

Pola súa banda, o BNG considerou que “a estas alturas” carece de “sentido” presentar un proxecto de orzamentos por non ter “tempo material para executalos”.

Así o expuxo o portavoz municipal do BNG, Francisco Jorquera, xunto á edil Avia Veira. Na comparecencia, manifestaron que esta formación concorrerá ás municipais con vocación de ser “alternativa” e alcanzar a Alcaldía.