Dúas persoas resultaron feridas e quedaron atrapadas nun vehículo tras unha saída de vía na tarde deste mércores no municipio coruñés de Paderne.
Segundo informou o 112, os bombeiros de Betanzos tiveron que retirar unha porta do coche para poder acceder aos ocupantes atrapados no interior.
O servizo recibiu a alerta do ocorrido pasadas as 17,00 horas, cando varios particulares comunicaron un accidente de tráfico na N-651, ao paso por San Pantaleón das Viñas, no concello de Paderne.
Nun primeiro momento descoñecíase a situación dos ocupantes do coche, pero, coa chegada dos primeiros equipos de emerxencias, observouse a necesidade da intervención dos recursos de salvamento.
Así, acudiron os Bombeiros de Betanzos, ademais dos voluntarios de Protección Civil de Miño, dos profesionais de Urxencias Sanitarias de Galicia-061 e dos axentes da Garda Civil de Tráfico. Tamén se desprazaron ao lugar dos feitos os membros da Policía Local de Miño. Tras a actuación dos bombeiros, os feridos foron evacuados ao Hospital da Coruña.
COLISIÓN ENTRE UN CAMIÓN E UN TRACTOR EN CALDAS
Por outra banda, o 112 recibiu o aviso dunha colisión entre un camión e un tractor en Caldas de Reis. A consecuencia do impacto, ambos os condutores necesitaron asistencia médica, polo que foron evacuados ao centro hospitalario máis próximo.
Neste operativo, activado ás 15,30 horas deste mércores, participaron os profesionais de Urxencias Sanitarias de Galicia-061, os axentes da Garda Civil de Tráfico e Policía Local, Protección Civil e persoal de limpeza e mantemento do Ministerio de Fomento.
