O Parlamento pediu a convocatoria “inmediata e urxente” da “mesa de transición xusta” das Pontes, coa participación de “todos os seus integrantes” e unha representación de REE.

Reclámao por mor dunha iniciativa do BNG que foi debatida este xoves durante a Comisión de Industria, Enerxía, Comercio e Turismo.

En concreto, a proposición non de lei expón que a Xunta esixa ao Goberno central o mantemento dos 1.400 MW de evacuación da central térmica de carbón das Pontes “no nó de transición xusta do concello”, para a realización do concurso de transición xusta “co mesmo procedemento empregado para adxudicar o acceso” ao nó da central térmica de Andorra-Teruel.

Tamén solicita o inicio “inmediato e urxente” do concurso de transición xusta para a adxudicación do nó de transición das Pontes correspondente aos 700 MW de evacuación que ocupaban os grupos 3 e 4 da central, co mesmo procedemento empregado tamén en Andorra-Teruel.