A alcaldesa da Coruña, Inés Rey, insistiu en que a Autoridade Portuaria e o consistorio están de acordo na apertura do Porto á cidade e a celebración de concertos nos seus peiraos. “Nós estamos a traballar coa Autoridade Portuaria os detalles técnicos para a organización de concertos no porto”, explicou a rexedora.

Fíxoo en resposta a preguntas dos xornalistas sobre o anuncio en redes sociais da venda de entradas para o concerto de ‘Marea’ con data do 22 de xullo e no peirao de Batería. “Hoxe mesmo hai xa unha reunión coa Autoridade Portuaria á que se suman os promotores”, puntualizou.

A rexedora insistiu en que “quedou claro” que a vontade de ambas as partes é abrir o porto á cidade, “entre outras cousas coa celebración de concertos alí como xa se fixo o ano pasado”. “É o acordo ao que se chegou na reunión do pasado día 16”, apostilou.