A Academia Galega do Audiovisual (AGA) anunciou que o galardoado co Premio de Honra Fernando Rei da XXI edición dos premios Mestre Mateo, que se celebrarán o próximo 11 de marzo en Ourense, será o produtor e compositor musical galego Nani García, en homenaxe á súa “dilatada traxectoria” como compositor das bandas sonoras de soadas películas e series.
Así o proclamou o conselleiro de Cultura, Educación, Formación Profesional e Universidades, Román Rodríguez, que foi o encargado de abrir o sobre co nome do premiado, en compañía do director da Axencia Galega de Industrias Culturais (Agadic), Jacobo Sutil, e do presidente da academia, Álvaro Pérez.
Desta forma, valórase a “dilatada carreira” e o compromiso coa divulgación musical vinculada ao sector audiovisual do compositor, que foi premiado en ata sete ocasiones pola academia grazas ás súas achegas en series e películas, como ‘Pratos combinados’ ou ‘Engurras’, das que compuxo a súa música orixinal.
Así mesmo, o músico nado na Coruña, que é tamén un dos socios fundadores da AGA, será recoñecido por ser unha figura pioneira” en Galicia, en produción musical para todos os formatos audiovisuais, e representar unha “inspiración” para “as vocacións de moitos novos artistas”.
Este premio entregarase na gala dos Mestre Mateo, que se celebrará o vindeiro sábado 11 de marzo no Auditorio Municipal de Ourense, unha “cita obrigada”, segundo Jacobo Sutil, na que se dá unha “importante visibilidade” ao audiovisual galego.
