Vén de lonxe a polémica entre percebeiros e bateeiros. Ambos levan anos compartindo rochas, a pesar das continuas queixas dos primeiros pola falta de controis que sofren os bateeiros. A realidade é que os bateeiros levan toda a vida extraendo a mexilla (a semente para as bateas) en toda a costa galega sen ninún tipo de limitación nin control de pesos. Unha situación que provoca a ira dos percebeiros, que vén como cada que vez que pasan os bateeiros as rochas quedan absolutamente esquilmadas. Ademais, os percebeiros aseguran que o mellor percebe medra cando ten mexilla ao redor.
Tras varios sucesos entre os dous sectores (chegando mesmo ás mans nun episocio en Muxía), as protestas dos percebeiros obrigaron á Xunta en 2020 a establecer unha serie de zonas reservadas para o percebe, excluíndo apenas 50 dos 1.700 km de costa á extracción da mexilla.
Unha decisión ridícula, pero ante a que os bateeiros non quedaron parados e seguiron protestando (este ano é certo que hai unha escaseza de cría) ata que a Xunta, hai apenas dúas semanas, eliminou 20 deses 50 km de restricións. Así, do total do litoral das provincias da Coruña e Pontevedra só o 16% está vedado á extracción de mexilla.
“Desde as confrarías non cremos que a apertura dun 16% de costa sexa a solución á escaseza de mexillón no 84% restante. Con todo, para os perceberos ese 16% é moi importante xa que se trata de zonas seleccionadas precisamente pola súa relevancia, xa sexa por cantidade ou por calidade”. “Perder esas zonas pode ser un auténtico drama nun ano xa de seu complicado”, sinala no seu comunicado a Federación Provincial de Confrarías.
Manfestación
Unha Federación que convoca unha concentración nas inmediacións da xefatura comarcal da Consellería do Mar en Ribeira o vindeiro venres, día 17.
A Federación denuncia que a Consellería “cedese ás presións do sector ‘bateeiro'” e de maneira “unilateral” inclúa a posibilidade de “saltarse” a normativa aprobada na xestión de recursos marisqueiros e pesqueiros e abra “zonas que, a proposta das confrarías, tiñan pechadas á extracción da fazula”.
Tamén lembra que no Diario Oficial de Galicia (DOG) saíu publicada a orde de aprobación dos plans de xestión para os recursos específicos, entre eles os do percebe, que inclúen zonas de exclusión para a extracción de fazula nas áreas máis significativas dos bancos de percebe.
