A explosión dunha secadora rexistrada nunha lavandaría da cidade da Coruña causou importantes danos materiais no local. E todo, ao parecer, por un chisqueiro que quedou entre a roupa que se estaba lavando. O gas e a alta temperatura provocaron o incidente. Afortunadamente todo quedou nun susto e non houbo que lamentar feridos.
Segundo informou o 112-Galicia, os feitos sucederon nunha lavandaría da Sexta Avenida do Polígono de Pocomaco, pouco despois das 19,30 horas deste martes.
Os Bombeiros da Coruña, desprazados ata a zona, sinalaron que explotara e ardera unha secadora, aínda que sen que ningunha persoa resultase ferida. No operativo tamén participaron efectivos do servizo de prevención, extinción de incendios e salvamento da Coruña, que sanearon a fachada, e de Policía Local e Nacional.
