Expertos e responsables de museos picassianos de España e Francia participarán o 24 de marzo, no Museo de Belas Artes da Coruña, nunha xornada sobre Picasso na que analizarán a obra do artista.

A xornada forma parte da proposta dos museos como centros de investigación, unha iniciativa da Xunta de Galicia deseñada e coordinada polo equipo técnico do Museo na que ofrecerán novas perspectivas da obra e traxectoria do pintor.

“Como os seus vínculos coa arte alemá, o proceso creativo da súa etapa de mocidade, a súa formación literaria ou o seu paso pola Escola de Belas Artes da Coruña“, sinala a Consellería de Cultura.

A actividade enmárcase no contexto da exposición ‘Picasso branco no recordo azul’, “a única mostra galega incluída na programación oficial da Celebración Picasso 1973-2023 impulsada polo Musée National Picasso-París e a Comisión Nacional para a conmemoración do 50 aniversario da morte de Pablo Picasso“, sinala a Consellería.