O grupo municipal do BNG presentará, no próximo pleno do Concello da Coruña, o día 13, unha moción para esixir ao goberno local a apertura dunha investigación interna para “velar pola correcta prestación” dos servizos de limpeza viaria e recollida de lixo tras a causa aberta ao redor do catro membros do Sindicato de Limpeza (STL) investigados por corrupción entre particulares, estafa e branqueo de capitais.
No caso de resultar probada a comisión de delitos, a formación política instou ao goberno municipal a “exercer coa máxima contundencia a potestade sancionadora, incluída a rescisión dos contratos de concesión”.
Así o informou o portavoz municipal do BNG no Concello da Coruña e candidato á Alcaldía, Francisco Jorquera, en rolda de prensa. “Estamos ante feitos de extrema gravidade“, denunciou. Jorquera insistiu en que “sobre todo” van propor a apertura dun proceso de investigación para determinar se as empresas concesionarias destes servizos “inhibíronse das súas responsabilidades delegando nun grupo a política de persoal incluíndo a contratación, a distribución de funcións e a promoción interna”.
Do mesmo xeito, van esixir determinar se a folga que afectou os servizos de limpeza en 2022 foi “pactada entre a concesionaria e un determinado grupo”. Jorquera destacou que “hai asuntos nos que o Concello é competente e ten a obrigación de actuar” e criticou que a actuación do goberno local ante esta situación fose “vacilante” e a súa resposta “tardía e contraditoria”.