a alcaldesa da Coruña sinalou que a cidade herculina será un dos concellos que se poderá beneficiar da mobilización de 50.000 vivendas da Sociedade de Xestión de Activos Procedentes da Reestruturación Bancaria (Sareb) para o aluguer alcanzable de mozos e familias que o Executivo aprobará este martes no Consello de Ministros.
“Entendemos que si”, contestou a rexedora a preguntas dos xornalistas sobre este anuncio feito este domingo polo presidente do Goberno, Pedro Sánchez. Ao fío deste anuncio, Rey criticou a “incomparecencia” da Xunta “no que é a súa competencia”, dixo sobre a política de vivenda e ao demandar actuacións do Goberno galego nesta materia.
Por outra banda, sobre a medida do Goberno central, a rexedora manifestou que “aínda non hai datos” das cidades que se poderán beneficiar desta medida e agradeceu á Sareb que “empezo” a facilitalos. “Traballaremos da man do Goberno central que vai contribuír e axudar na política de vivenda”, contrapuxo a rexedora, que lembrou que os concellos non teñen “competencias directas”.
MURAIS DE LUGRÍS
Por outra banda, a alcaldesa da Coruña, instou á Xunta a que “axilice” a tramitación do expediente para a declaración como Ben de Interese Cultural (BIC) dos 12 murais de Lugrís localizados no número 25 da rúa Olmos, nas paredes do antigo restaurante Fornos para que conten “coa máxima protección”.
O goberno autonómico “ten uns prazos amplos para facelo pero entendemos que a situación require da maior dilixencia posible e sobre todo de interese na defensa do patrimonio histórico e cultural de todos os galegos”, sinalou a rexedora.
Rei explicou que as obras “evidentemente están moi deterioradas pero a boa noticia é que son recuperables”, segundo reflectiron uns informes técnicos encargados polo Concello “en novembro” para analizar en que estado se atopaban. “Requirimos á propiedade que acometa a súa restauración”, informou. “Damos por feito que se non o fai farémolo nós de maneira subsidiaria”, anunciou e engadiu que este proceso suporá un custo “ao redor de 90.000 euros”.
