Este domingo día 23 celébrase no Teatro Colón da Coruña a gala final de ‘Quero Cantar’, na que o seis formacións finalistas –tres na categoría infantil e outras tantas na xuvenil– interpretarán en directo os temas cos que optan ao premio da sexta edición deste certame musical da Deputación da Coruña.
Segundo informa o organismo provincial nun comunicado, o xurado estará formado por nenos e mozos das mesmas idades que os concursantes que proveñen dos municipios de Ames, A Laracha, Cortegada e Santiago de Compostela. A cita é ás 17,30 horas e as entradas, gratuítas, xa se poden retirar na páxina web do teatro.
A actriz Soidade Felloza será a presentadora do evento, no que actuarán como convidadas a banda Bonhomía e a solista Noelia Perpetuo, gañadoras da edición anterior do certame.
Os premiados nesta edición serán galardoados coa gravación dunha maqueta en estudo profesional e dun videoclip coa canción gañadora, ademais de material musical e produtos culturais en galego por valor de entre 500 e 1.500 euros.
