- Concello e entidades constitúen a mesa de seguimento para desenvolver a normativa que regule as vivendas de uso turístico.
—–
Os hoteis galegos rexistraron un total de 462.557 pernoctacións durante o mes de marzo, o que supón un 12,1% máis que no mesmo mes de 2022, mentres que os viaxeiros hospedados creceron un 16,2%, ata as 251.674 persoas.
Así se desprende do informe de Conxuntura Turística Hoteleira publicado este luns polo Instituto Nacional de Estatística (INE), recollido por Europa Press, que explica que o avance das pernoctacións en Galicia é inferior ao da media estatal, xa que no total de España incrementáronse un 17,1%, ata superar os 20,6 millóns de noites. Tamén o número de viaxeiros subiu un 21,9%, con 7,3 millóns.
Por provincias, todas as rexións galegas aumentaron a cantidade de pernoctacións e de viaxeiros. Así, A Coruña contabilizou en marzo 234.804 pernoctacións (+17,5%) e 125.283 viaxeiros (+16,6%). En Lugo alcanzaron as 57.431 (+16,1%), mentres que os viaxeiros foron 33.604 (+13,9).
En Ourense rexistráronse 43.300 pernoctacións (+6,6%) e 23.435 viaxeiros (+8,7%), por baixo de Pontevedra, onde se alcanzaron as 127.023 pernoctacións en hoteis en marzo (+3,6%), con 69.352 viaxeiros (+19,5%).
Con estas cifras, o grao de ocupación hoteleira quedou de media en Galicia no 28,7%, sendo a que tivo menor cifra en marzo do conxunto do Estado. Os establecementos galegos facturaron de media 56,42 euros por habitación ocupada.
Mesa
As cifras coinciden coa creación dunha mesa de regulación das vivendas de uso turístico. Representantes municipais e da Asociación de Vivendas Turísticas de Galicia (Rafael Serrano), Aproinco (Ángel Jove), Hospeco (Agustín Collazos Martín e Concepción Labrador Lombardía), Federación de Asociacións de Veciños da Coruña (Luisa Varela e Juan Manuel Iglesias Rey), Colexio Oficial de Administradores de Predios, Asociación de Inquilinos da Coruña, ademais do Colexio de Axentes da Propiedade Inmobiliaria (Patricia Vérez e Esperanza González), constitúen un organismo para “poñer en común as súas iniciativas co fin de avanzar na elaboración dunha normativa regulatoria para as vivendas de uso turístico”.
